Tuti quanti, al dì de uncuò, no son boni de star senza un teefonin.
Dal ceo de 10 anni che no pol star sotto l'occhio vigile de so mare, al bociassa de 15 ani chel move el pollice co un ritmo che supera, in BPM, el Moka DJ dei tempi migliori.
Che el cellulare fae mal, questo o savon, nonostante no ghe sia alcuna
fonte ufficiale che lo dise. Del resto, guai a ndar contro i coeossi dea telefonia.
Comunque, de sicuro ben nol fà. E su questo son tuti d'accordo. Quantificar inveze quant mal chel fa, ancora no o savon. Ma, ripeto, el cellulare BEN NOL FA.
Del resto, disonse a verità ... chi voria aver l'antennon dea wind fora casa ? Beh, mi ghe n'ho uno qua vizin. Deve ringraziar un privato chel se a prostituio par 700 euro/mese dandoghe un fazoet de terra in affitto aea vodafone. E varda caso sto toc de terra l'è el pì distante posibie daea so abitazion...
Ciononostante continuon a lamentarse de antennoni che nasse come fonc, nesuni rinuncia al teefonin. Mi no l'ho, ma so de essar na eccezion. E nol fae par voer far el diverso o par taccagneria : semplicemente el trove invasivo e fastidioso. A volte utie, gnent da dir. Ma 9 volte su 10 el vien usà tant parchè l'avon e parchè ghe n'è credito dentro.
Bon, ghe n'è un motivo in pì par no ciorse un teefonin : el circuito interno de ogni teefonin el contien un minerale metallico che se ciama "coltan", che el se estrae sopratutto in Africa, e precisamente el Congo. L'80% de tut sto coltan el riva da là.
Savon tuti che l'Africa l'è un posto strano : l'è na riserva immensa de risorse naturai (oro diamanti petrolio legno minerali etc). Eppure i è sempre poreti. Lori sì che veramente i more da fam. Chi che ghin beneficia dee risorse africane i è i soiti europei/americani.
Oltre a questo, l'attività de estrazion a causa continui disboscamenti e reativa bastonada par l'ecosistema. Avè mai vist i gorilla del film "gorilla nella nebbia" ? Bon, ghin'è sempre manco.
Quindi, prima de ingrassar i signori dea nokia o dea lg cambiando ogni anno un teefonin, feghe na pensada...
Desse continuè pure a mandar sms ...

Fonte dea notissia .. QUA

P'Arquà o P'arlà ?

Deve in qualche modo scaricar tuta a melma che quotidianemente invade i me dì (anca se dubito che ghe sia tanta gente che no a sente o vede melma tuti i dì' : semplicemente no a vol vedar).
Domenega : Gitarella fora porta, destinazion Arquà Petrarca.
Tra i vari fastidi visti, no so se el pì imponente (che no posse documentar) l' è stat el sorpasso de e (TRE) lamborghini una drio man de chealtra e de na ferrari. Me sentive un s'cios.. e el rumor el parea quel de aerei che decoea.
Parlando de aerei, questa l'è a firma (col zoom) de uno dee desine de aerei che domenega (ma anca uncuò, luni) i pasava vanti e indrio. Cliccarghe sora par vedar l'ingrandimento.



Me son permesso anca de caricar un videet sul tubo. Ecoeo qua.




Oltre a questo, deve segnaear el continuo "proibizionismo" verso i can.
Mai na volta che lede "Please no deficients".
Casso, ma me desmentagave che i can de soito al bar no i consuma. I bauchi inveze i pol pagar. Quindi portar Schei. Schei : el protagonista indiscusso dei nostri anni.




E inveze da n'altra parte i can i è ben voesti e utii. Sì, par sbranarte.

Se i scrivea "PERICOEO DE MORTE" secondo mi gl'iera el stesso.
Consiglie anca ai paroni a prossima volta de metar un teschio (umano, no de can) e dontarghe a scritta NON GUARDARE. Visto che el cagnazz che fasea da guardia, pien de bave fin sul nas, el podaria farghe vegnar un infarto a qualche vecet.

Comunque, dai, qualcossa de bel da vedar el ghin'è sempre, par fortuna.


p.s. ho brusà i anabagglianti dea machina (no ho na lamborghini). Ogni tant capita, se sà. L'ultima volta avee comprae par 4 euro l'una e me ere rangià a metarle sù (beh..co na man dal fradel). Ho vest a brillante idea de ndar dall' elettrauto Poloni, in contea davanti al bar bastian : do lampadine e 5 minuti de lavoro 24 Euro. Colpa mea de no aver domandà prima. Colpa dell'elettrauto de essar un ladro.

Fiol de un can? NO ! Figlio di un cane !

Beh insomma questa deve proprio contarla.
Qualche dì fà ere dal veterinario drio spetar el me turno ... anzi a onor del vero el turno gl'iera drio spetarlo el me cunicio che el dovea ndar farse tranciar i dent, visto che i cresse storti e el ghe creà rogne a magnar.
Davanti a mi ghe n'era na coppietta de sposi, o morosi , no so. Insomma un lù e na ea. Che in tra de lori i parlava tranquiamente tipo "l'è un toc che no porton el can qua", oppure "speron che el veterinario nol cate casini", insomma un bon diaetto "nativo" diretto e sciett.
Bon ... ma pena che i se rivolgea al so can pien de fifa, par rincuorarlo na 'scianta co na carezza e do paroe, ecco che improvvisamente cambia no solche i toni ma anca e sopratutto el vocaboeario usà: "Povero il mio Fido, non avere paura dai, solo pochi minuti e poi tutto passa. Non fare così, fai il cane bravo e coraggioso"... e vanti co sta solfa.
Morae dea favoea... al dì de uncuò sentir parlarghe ai boce "umani" in diaetto l'è ormai pì raro che catar un poitico onesto; el diaetto l'è diventà sinonimo de gente grezza, contadinota e ignorante. Quindi ovviamente un ceo che cresse el dovarà saver da subito solche l'italico idioma (e dopo qualche anno l'inglese ovvio, e magari linguaggi cobol o pascal col pc). Conseguenza ovvia l'è che el diaetto, portatore sano de tradizion e cultura aea stessa maniera de un castel o de un affresco, l'è destinà a deperir e anca de corsa.
Certo che però anca rivolgiarse a un can co toni "nobii" me par massa. Bisognarà star tenti anca a come ciamarlo e come parlarghe par evitar denunce dai "padroncini".
Quindi se vedè un can, occio a come che ghe parlè ... se par caso sentì un "bau" rispondeghe "sorry, don't anderstend"...