Nostalgia Canaja

Pur no avendo a tivision, ogni tant fae el pirata e me scariche dall'internet qualcossa dai soiti circuiti pir-tu-pir. Documentari o roba dove comunque a quaità audio-video no l'è da cinema : del resto na roba l'è vedarse un film sul schermett de un portatie, n'altra roba l'è vardarseo su un bel plasma 50 pollici ...
Diseve...me son scaricà na specie de "the best of 90° Minuto". Adesse no ho a tivision, ma quando che ere bocia sì, probabilmente a quaità a era superiore (a quantità de programmi ovviamente no). Ricorde sto 90° Minuto e a vose de Paolo Valenti l'anticamera ... dea camera, nel senso che intanto che mandave dò na menestra o na insaeata coi capuzz ghe n'era de sottofondo a tivision coi gol e coe varie vosi de gente che a risentirle/rivedarle me vien i sgrisoeon : Giannini da Firenza, Gianni Vasino da Milano, Luigi Necco da Avellino, Bubba (??) da Genova, e avanti...

No vui far sempre quel che se lamenta e che cata sempre e robe negative dee robe del dì de uncuò. Però vedendo certi servizi (el programma l'è scumizià verso a metà anni '70) me son reso conto de quante robe che i è cambiae in pochi decenni. Cambiae ovviamente in pedo.
Alcune robe che me ha restà impresso:
- Quando che no rivava .. e videocassette daea città (el digitale ancora no esistea) i faseva vedar i goi co un schizzetto su na lavagnetta.
- Nee zone dea porta, i meteva a segadura. Adesse chi la vede pì ?
- A volte no ghe n'era servizi video par "sciopero dei cameramen"...
- Pubblicità durante e interviste inesistenti, manco che manco sponsor.
- Sui stadi, parecchia pubblicità made-in-italy de Martini e Cinzano. No multinazionai.
- Diogatori senza l'aria da VIP attuale.
- El calcio gl'iera veramente na roba popoeare, sopratutto maschile (no veline..)
- Prima e dopo e partie (e ovviamente durante l'intervallo) i raccattapalle i diogava sul stadio... che fine hai fatt adesse ??
- etc etc etc

Consiglie a chiunque de darghe na ociada. Su iutub ghe n'è spezzoni de90° minuto, ocio però che podaria vegnar fora l'effetto lagrimetta ...