Cernobyl e Anare

Cossa pol c'entrar Cernobyl coe Anare ?
Visto che l'è improvvisamente tornà aea ribalta l'argomento nucleare sì/no (aea faccia del referendum) me mare ieri altro e me dise che all'epoca de Cernobyl gl'iera proibio de magnar verdura da foja (saeada, radici etc).
Visto che el disastro de Cernobyl l'è successo a fine aprile, proprio a stajon dove che sboccia e scumizia a cressar de tutt, na eventuale contaminazion sul terreno el se ripercuoteva (che verbo strano) anca sua verdura.

Morale: ghe avon dat e foje de verdura ae anare. Risultato : e anare dopo pochi dì e a pers e gambe (nel senso che no e ghe a faseva pì a star in piè) e dopo na settimana... adios Anare.

Ma tanto ... "il nucleare è sicuro".

Lega Carega

Visto che a lega a va vanti a colpi de slogan, me a piasest quel conià daea sindaca de Maserada...
"Roma ladrona la lega non perdona" ??
No ... visto che a se ha incort che ghe n'è na corsa anca da parte dei leghisti a ciapar el posto de assessore/consigliere, magari dopo par ndar in provincia, region, fin aea massima ambizion de aver a careghetta in parlamento ..
questa a sona mejo:
"LEGA CAREGA" !!

Ciao "Gatti Piccoli"

Sto post qua l'è puramente personae, el mette a titoeo de memoria se un doman me capitasse de riledarme, anca se sicuramente a situazion che qua scrive farò fadiga a desmentegarla.

Fine giugno 2010: dovaria essar stat un mercol,quindi el 23 ma no ghin scommette.
Vae co me nevodo a farme na girada in bicicleta par quea poca campagna che resta. A un certo punto sention miagoear. Ovvio che gl'iera el miagoear acuto de gat cei,pena nasesti. Vardon sui camp,gnent. Vardon sul foss...ecoeo là:un sachèt de carta maron(tipo quei par el pan) naviga lentamente sull'acqua. L'è el periodo de irrigazion dei camp, quindi i foss i è pieni. El destino de sto sachèt dopo pochi metri saria quel de ndar sotto, visto che el foss el va sotto a strada.
Ovvio che dentro el sachetin ghe n'è dei gatei: mi e me nevodo se vardon in facia,lù el smonta daea bici e el ciol su el sachèt. Co dentro 3 gatei pena nasesti. E co ancora dea paja.
Tornon casa,vae cior na cassetta de legno, meton in gatei sul garage de me sorea al càlt,co qualche strazza de lana. Riva anca qualche vicino a curiosar e cercar de dar na man,salta fora na specie de biberon che pol servir a darghe latte.
Parte l'operazione "salvataggio gatei", el veterinario el dise che i verde i occi dopo circa 11 giorni daea nascita. Co na semplice sottrazion salta fora che sti gatei i e stati cavài a so mare praticamente suìto.
E ora comprar mini biberon,latte specifico par gatei senza mamma-gatta,sverminarli, veterinario.
Fason el posibie par far in modo che i ghe a fae.
A moglie a se prodiga come che i fosse i so tosatei. Gran persona.

Uno dei tre gatei nol ghe a fa. El pì debol,el pì ceo, quel che el veterinario el veva provà
anca a farghe qualche punturetta de "ricostituente".
Pena el temp de verdar i occi, e me o cate mort dentro el scatoeon de carton dea coop dove che i 3 gatei i stava.
Un bùs par tera, e ciao Coccolino.

El temp passa,chiaramente se se affeziona tantissimo a ste 2 bestiòe, sarà anca na roba contro natura che dee bestie e vegne slevae da bestie de n'altra razza, sarà forse considerà eccessivo l'attaccamento verso de lore, ma va ben cusita.
Salta praticamente anca e ferie, visto che in nome de sti 2 gatei no se pol assentarse da casa par massa tempo. A moglie a se passa un fine settimana sui bosc de Lentiai da na amiga. Co gat al seguito,ovviamente.
I gat i me considera noaltri come gat, i passa el temp sempre co noaltri dentro casa, no i se fida de ndar fora massa tant, a meno che no ghe sia qualcuni de noaltri. Ghe n'è poc da far : son considerai na specie de "mamma gatta". E viceversa in un certo senso, visto che no avon fioj, lori i è i nostri tosatei.
Ogni tant na visitina de controeo dal veterinario : tut reogeare.
El 14 dicembre i vien vaccinai. Con consegna dea "cartà de identità" : Predator e Gastone.
Chiaramente a vivacità a se sente, data a giovane età, e praticamente daea matina fin sera a presenza dei gatei l'è costante. Da pèna che leve su dal lett e me cioe i calzet che lori identifica come diogatol, a quando che te ciapa sòno co un gatt sul còl...
Tut procede bene,lori i cresse sani, ognuno col so carattere, uno pì diogatoeon e "permaeoso", chealtro pì ceo,pì coccoeòn.
I scumizia de recente a ciapar confidenza co l'ambiente esterno: coe prime giornae na sciante pì calde i ghe ciapa gusto a star al sol, ogni tant vedendo chealtri gat pì grandi i ha l'ardore de ndar anca qualche metro "oltre confine". Insomma, i scumizia a rendarse conto che i è dei gat.

11 marzo 2011.
Rive casa aea sera,a moglie me fa "Ho na brutta notizia, anzi 2".
I gatt i è dal veterinario, li ha visti in preda a brutte convulsioni,co bave e diarrea anomala. Completamente coi nervi fora. I pareva indemoniai.
Tipico sintomo da inveenamento.
I gatt i aveva catà un bel bocconcino, che come spesso capita lori i te porta dentro come par dir "varda che bravi che son stati,cossa che avon catà".
Sto bocconcino praticamente l'era na specie de "panin" a 3 strati. I 2 strati esterni pareva quasi prosciutto.
El strato interno bianco sporco, tipo latte in polvere. El vèen.
Suìto dal veterinario, 50%-50%. Uno pareva chel podesse farghea, chealtro manco.
Punturette de vario tipo, l'inveenamento l'è una dee pedo robe che qualsiasi essere vivente el posse provar. Na agonia costante.
El ghe ciappa i polmon.
Ae 22.30 el veterinario el decide de farghe n'altra puntura. L'ultima. Quea che li farà dormir
par sempre. El ghe o disarà a matina drìo aea moglie al teefono,par no rovinarme a nott.
L'è successo tut cusita in modo improvviso...porca miseria...
Adesse farò denuncie de vario tipo,provarò sentir un giornal locale,consapevoe del fatto che no savarò mai l'autore de un gesto cusita vile anca se ovviamente de dubbi ghin'ho.
Un gat el resta all'ULSS par na specie de "autopsia" e esame tossicologico. Chealtro gat l'è tornà casa, ho scavà un bùs par tera, dopo no ghe ho fatta e no ho gnanca voest vedar el gat. Ghe ho assà aea moglie el compito de finir el lavoro. Son sciopà criàr come un tosatèl.
Pore bestie. Proprio destinae a morir, "grazie" a membri dea razza umana che ha l'arroganza e prepotenza de voer comandar e controear tutt, anca e vite de chealtri.
Ciao Predator ... "ne-na-no-ni-no pum pum, pum pum"....
Ciao Cuiquitin ... "Rimani chiquito"...
Uf...

Earthlings

Recentemente ho abbraccià un stile de vita, soprattuto alimentare, che fa pòc uso de oggetti de estrazion animale. Anca se l'è impossibie starghene fòra completamente. Esempio: Certi tipi de birra fa uso de sostanze (coeoranti etc) de origine animale. Ma sui ingredienti no sarà mai scritto. Al limite cataron un E999, che ovviamente nol dise ghent a meno che uno de so spontaneà voeontà no se mete a ndar in zerca (San gugòl ...).
Conoscenti i ha organizzà na serata "vegana" dove che oltre proporre un banchetto informativo e buffet vegano, i fasea vedar un film-documentario che personalmente ho evità de vardàr. Ma visto che fòra fasèa fret, ho dovest star dentro, scònt drio na persona. Anca se l'audio assava capir de cossa che se trattava.
A fae curta : vardeve Earthlings (Terrestri) e dopo magneve na bistecca, o ndè al circo, o compreve un pèr de scarpe de curàn.
Vien fat vedar e spiegà come che funziona el marcà dee bestie in merito a : cibo - vestiario - compagnia - intrattenimento - ricerca scientifica.
Pur no avendoeo vist, el me ha assà el segno.

Earthlings colma una lacuna, un grave vuoto di informazione creato appositamente dal mercato della carne che, per ovvie ragioni di lucro, ha tutto l’interesse a nascondere al consumatore l’origine di quello che viene definito ‘cibo’, ma che prima di tutto era un animale, ossia un essere vivente e senziente capace di soffrire, di provare angoscia e paura della morte.

Proprio come noi. "La verità è che coloro che mangiano prodotti che richiedono la morte degli animali non meritano la comodità dell’ignoranza come scusa per non conoscere l’origine della carne che comprano.”

Vardeveo, su iutube :
http://www.youtube.com/results?search_query=earthlings+italiano&aq=0
O perlomeno, chiunque dovaria aver coscienza e conoscenza su come che viè trattae e bestie.
Co che corajo adesse posse mettar in boca un panin coa soppressa?