Schivanee e sgommae par aria

Ere drio ndar lavorar, tache in moto a machina ma pena che alze a testa e vede el merdaio che i era drio far sul cielo, son smontà e sonà el campanel de casa. A femena (usà in senso dialettale, no dispregiativo) l'avarà pensà cossa che me son desmentegà ... semplicemente dovee dirghe de ciapar a macchinetta fotografica (che fa anca video, no importa de bassa quaità) e de riprendar par i posteri ma anca par i viventi (dormienti) el schifo.
I commenti i è superflui : se qualcuni sa dar na motivazion de chi ghe pol far certe acrobazie nel cielo (miitari, me vien da pensar) e sopratutto come che l'è possibie che se forme dee scie a quote cusita basse. "Probabilmente" no è i è scie de condensa. "Forse" a papetta bianca a vien emessa artificialmente dai aerei. Parchè ? Bea domanda ...
Un commento el dae mi, de fronte a sto scempio : Zioken!



p.s. 60 MB de .avi daea machinetta a iutube ghe vol na marea de tempo. No ste farlo se dovè ciapar el treno (... o l'aereo...)

E la scoria continua ...

E insomma el vostro capo del governo el ghin' ha tirà fora n'altra dal so ciindro. In faccia al referendum de qualche decennio fa, lù col so coega francese i fa un accordo de ripartir col nucleare.
Qualcossa coi 2 eà i e drio far de scondion : prima el berlusca el ghe regaea l'alitalia aea francia par do franchi, adesse el ghe dà in man ai francesi, già esperti in materia, el progetto de costruir sul stival centrai nucleari.
I pol contarme quel che i vol, mi no capisse tant de fission nucleari e scorie radioattive etc, ma so solche i danni causai dae centrali. Fin ai ultimi do, se no sbaglie proprio in slovenia e francia. E nell '86 quel de cernobyl no ghin parlon : ho memoria che i raccomandava de no semenar o piantar alcuni tipi de verdure parchè a radioattività, che vegnea do coe piove, a intaccava anca i terreni qua. A migliaia de km de distanza. E se capitasse na rogna del genere a na centrae qua vizina ?? Altro che capuzz da no impiantar, i me raccomandarà de no respirar ...
Pararia anca che el berlusca, che no ston desmentegarse l'è a tessara 1816 dea tristemente famosa P2 el vol portar vanti el Piano de Rinascita Democratica dove che l'è espressamente dichiarà : b11) concedere incentivi prioritari ai settori: .... IV - energetico convenzionale e futuribile (nucleare - geotermico - solare).
El solare e geotermico ancora no l'è sua toea de discussion.
Notare che ultimamente el berlusca l'è drio portar vanti pesantemente i punti che a P2 capitanada dal venerabie licio gelli i voeva : riforma dea giustizia, modifica dea costituzion, controeo dei media, etc.

Altra chicca che no saveve...ste centrai de tersa generassion i è anca pì
pericoeose dee precedenti e emette pì radiassion !
A fonte a provien da paese dove che i giornaisti no i fa i giornalai, e i scrive
articoi tipo
QUESTO
Mi no son un fisico o un tecnico. Ma no ghe vol tant a saverghene de pì del piduista de arcore.

Mi no me piase augurarghe del mal a chiunque, ma certo che se prima del 2020 el voltasse l'ocio ...

Occio qua ... par i forti de stomego

Vietato - Proibito

El mese passà avon vest a malsana idea de ndar sul Cansiglio.
Malsana primo parchè no ghe n'era praticamente neve.
Secondo parchè me pareva de essar sue vicinanze de un campo minato, vista a massiccia presenza de cartei "vietato questo" , "vietato st'altro". Se capitè sua piana del Cansiglio, ve consiglie de star all'occhio ai cartei esattamente come che ve capità quando che guidando a machina dovè rispettar i vari limit e codici stradai : "PERICOLO" , "PISTA A PAGAMENTO" (caminar l'è gratis, quindi star aea larga" , "SU QUESTE PISTE E' VIETATO L'USO DEGLI SLITTINI" , "VIETATO L'ACCESSO NEI PRATI E NEI PASCOLI".



Gente, son drio parlar dea montagna, e no dei paraggi dell'area 52 o de qualche base miitar americana. Cansiglio, no Nevada o Aviano.

Ma quel che l'è pedo l'è che a cima del Monte Pizzoc, che praticamente sovrasta el Cansiglio, l'è drio essar privatizzà.
Anzi l'è già privatizzà : attualmente l'è de Italcementi. Cossa che apie in comune na industria de cemento co na cima de na montagna, onestamente proprio nol capisse.
Privatizzar na cima de na montagna me par esagerato. Visto che i fini i sarà
puramente commerciali. Asse immaginar e conseguenze.
Ghe n'è anca na petizion: ledeve l'articol e firmè !
Clicchè qua

Mi de soito vae in montagna in zerca de relax, sienzio e tranquiità. Inveze no, cate qualcossa de schifoso anca là. Un doman par star chieti dovaron ndar sua Luna.
Corajo.

Ciaspe Diem

Uncuò giradina dae parti de Moena par vedar na 'scianta (anzi, na pacca!) de neve. Giornada ottima. Nonostante e soite scie chimiche in azione.
Consiglie a chiunque che voesse farse na caminada in tea neve abbondante farinosa de dotarse de ciaspe, o ciaspoe, o racchette par neve. Sopratutto se ndè fora dae piste/sentieri già batesti dove che no se sprofonda.

Par sprofodondar intende questo.



Sinò, dise sul serio, a fadiga l'è bestiae sopratutto par chi come el sottoscritto no l'è propriamente un atleta dedito a sport e attività par ottimizzar el fisico.

Ovviamente però visto che no son content se no cate qualcossa che me stomeghea o che me fa star mal (scie a parte, quee no manca mai) ho catà qualche segnaetica stradae interessante...



... che tradotta in linguaggio diretto a vol dir :
No se pol caminar o ndar coa slitta par de qua : a pista l'è riservada al sci da fondo (che ovviamente se paga). Visto che camminar l'è gratis, a noaltri no me rende gent, quindi ndè altrove.
Inutie dir che se tratta de sentiero no privato, quindi in teoria "de tutti". Sì , de tutti quei che paga.
Del resto, tutta a zona de Moena e Passo S.Pellegrino a pullula de sciatori, da fondo e non, e par a plebe che vol farse na caminada tranquia fora dai parcheggi strapieni no ghe n'è tante possibità.

Par fortuna el panorama e qualche incontro co qualche "nativo" del posto el fa tornar a luna na scianta in mejo.

Farmacie? Tut marketing

Me mare l' ha passà i 70 anni. Da qualche tempo la ha e so rogne : doeori ae gambe, ai braz, etc. I oss i scumizia a far cheo, del resto a na certa età el corpo el te parecia el conto.
A me domanda de portarla in farmacia par ciorghe qualcossa. No son stat bon de convinzarla che no serve. Probabilmente, qualsiasi roba che a cioearà l'avarà qualche strano effetto collaterale e magari tra qualche dì l'avarà mai te testa, o de panza, o qualche rossor sua pel etc. Comunque el farmacista el ghe a dat na pomata ... qualcuni me spiegarà come che a pol na pomata passar a pel e ndar a beneficiar i oss (probabie causa del mal ai arti). Ma no vui far el sapientin. Comunque se ghe passà el doeor, el merito sarà del zervel e dell'effetto placebo generà daea medesina.
Me a vegnest in ment e farmacie parchè tempo fa aveve lett qualcossa relativamente all' Industria farmaceutica. Ebbene sì, come tutte e industrie el scopo l'è quel de produrre e vendar. E visto che e maggiori case farmaceutiche i è dee multinazionali, e ora pedo che pedo. Visto che el scopo numero 1 dee multinazionali l'è solche e esclusivamente uno : el Profitto. Ebbene sì, in nome del profitto (in diaetto se dise Schei) no esiste regoe. Tut vale, basta farghin tanti, de schei. Par vendar, ai nostri tempi, savon che senza un bon marketing no se vende. Se el prodotto l'è bon e ora ancora mejo, ma l'importante l'è piazzar pubblicità e martear a gente co slogan a manetta.
Ricerca e sviuppo? Importante sì, ma mai come el marketing. Occio qua sta tabea che riassume quant che ste megaindustrie del farmaco spende in marketing e in ricerca&sviuppo.



Penso che ogni commento sia superfluo.
Par ogni dollaro investio in ricerca, 2 dollari i è butai via in marketing.

Magari el coegamento nol ghe sta massa, comunque quea pora desgraziada (in senso che ghe a capità na gran desgrazia) de Eluana che l'ha passà quel che l'ha passà, a costava se dise sui 4000 euro al mese. A cifra a pol starghe, considerando macchinari e dottori che ghe stava drio (clinica privata, se suppone). Ok, l'è brut da dir, ma situazion del genere e i è ideali par chi che ghin lucra coa saeute. Tegnar un vecio de 90 ani vivo co canete e sondini vari rende fiss : medesine, pannoloni, etc a un so prezzo. Chiaramente nel privato. Ma ormai a sanità pubblica fa schifo : par aver prestazion decenti e tempi de visita/test/ricovero decorosi te deve ndar dai privati e pagar. Inutie contarsea. Magari alcune USL funzia mejo de altre, ma a tendenza l'è quea. Del resto se taja sull'istruzion, sua sanità etc. I schei mejo destinarli aea Difesa e comprar aerei e armi.
A proposito. Farmaco deriva dal greco "medicamento". Col passar dei secoi farmaco vol dir "sperar che a gente stae mal par guadagnarghe".
Tema dei prossimi post : se a gente sta mal = guadagnarghe, e ora parchè no far stal mal a gente ?
Consiglio a lettura de sto post qua ...

Ramboso

Mi me son cappottà dal ridar fin da suito.
Fin desse l'avarà vist almanco 5-6 volte.
Son appassionà del diaetto, e me piase anca ledar robe in tea me vera
lingua madre.
Me fradel na serà el me fa "va in zeca sul iutube de ramboso".
No l'avesse mai fatt ... na parodia de un quarto de ora ed Rambo 1 (anno de grazia '82) doppià da qualche padovan o vicentin (l'accento no l'è el meo) senza i soiti bestemon che rende el veneto (inteso come lingua, no come persone...) simpatico e da ridar. Chi che l'ha fatt sta roba el ghe a mess temp, ma sopratutto testa a pensar aea "trama" da darghe a sta storiea. Bravi ragassi.
Eco qua el primo tempo. Par a seconda parte ghe rivè da soi.
El toc che me piase de pì ?? Mah... el modo in vien dita "mon scerì" da Toni Grinton l'è eccezzionae. Ma anca l'autista del camion el ghin tira fora un per de forti...
Fantastico ...

Morte a Venezia

Domenega son stati a Venezia, approfittando dea giornata favoeosa e visto che ghe n'è carneval.
Gnent da dir, a città l'è sempre un gran bel vedar : un museo a cielo aperto.
Na pacca de gente dapartut, te sentia na marea de lingue diverse e de persone
da tut el mondo. Machinete fotografiche e videocamere all'opera.
Se son fermai in libreria : se son portai via "Il Piccolo Principe" tradotto in diaetto venezian : "El Principe Picinin". Parlando coa moglie, pareva che sia positivo che ghe sie ste robe qua tradotte in diaetto e che voea dir che el diaetto l'è ancora vivo e vegeto. Inveze, secondo el me punto de vista, el rappresenta a so morte. Se a fosse na lingua viva ed attiva, nessuni se preoccuparia de farghe libri in so onore. A lingua attiva l'è l'italiano : nessuni se sorprende a ledar libri in italiano. El diaetto l'è morto, de sto passo co un per de generazion el sparirà completamente. Ecco parchè se scumizia a celebrarlo anca dal punto de vista letterario.
Venezia l'è morta da diverso temp, a se a trasformà da posto attivo e pien de vita in un centro commerciale gigantesco. Che pena che riva sera el se stusa completamente insieme ae luci dei negozi : no te vede un tosatel par strada che dioga, no te sente nessuni che canta, no te sente odori de qualche poenta e osei dae finestre dei paeazzi, gnent de gnent. Venezia l'è diventada un gran affare, na naranza da strucar el pì posibie finchè a ghe a fà.
Che tristezza.
Qualcossa de spiritoso l'ho comunque catà .. areo qua ..

El Sol levante

Son ndati magnar su un ristorante giapponese, par mi la era a prima volta.
Gnent a che vedar coa moda del momento del sushi da asporto. Proprio un ristorante. Che qua in zona l'ha praticamente el monopolio, visto che i è proprio giapanoti veraci, no ghe n'è i so cloni-copioni cinesi. El posto l'è a Bassan (ma i ha un locale anca a Vicensa). Beh, tut n'altro mondo ! Ok, no ghe n'è i tavoin bassi, no i mette musica giapanota, ma tut el resto l'è puro sol levante. Sopratutto a gente che ghe lavora. Mai visti ridar, mai visti parlar tra de lori. Quadrati 100%.
Desmentegarse cioppe de pan o fette de Montasio : qua tutto a base de pesce, sicuramente freschissimo, e soja a voeontà (el sal? cossa eo?)
Sua foto qua sora : Sushi e sushimi ai sette colori. El par fat col photoshop da quant che l'è parecià ben.
Nota dolente ... el scontrin. Par do persone, menù completo co na scianta de vin acqua dolce e caffè ... sui 150 euro. Tanti, vero ? E te va fora coa panza "giusta" , no sgionfa ...
Se interessa, controè el tacuin chel sia pien ! El locale l'è questo ...
Arigatò !

In inverno se scia

Ecome qua ...
L'argomento l'è deicato e complesso, anca parchè purtroppo fin desse risposte ufficiali no i è state date nonostante svariate interrogazion parlamentari (anca a livello UE).
Ciamonle scie chimiche, scie comiche, scie de non-condensa.
Qua no vui convinzar nesuni, ognuno de noaltri l'ha na testa pensante, coi 5 sensi che serve a portar informazion al zervel.
Semplicemente voria darve "el LA", dopo internet el fornisse documentazion e testimonianze a iosa. Ma l'argomento o ritrattaron spesso.
Un bon punto de partenza l'è questo.
Ste foto e o fatte ieri altro qua fora casa : na giornada eccezzionae, quasi primaverile. Nessuna nuvoea, cielo azzurro come dio (o chi per esso) comanda.
E ora cossa ea sta roba ?? Sgomae e schivanee de qualche artista volante?
E immagini, se ghe clicchè sora, e dovaria essar a alta definizion.