Censura su youtube

Riporte un tremendo caso de censura ai danni
de un blogger (che mi periocamente lede) che se ha vist censurar
da youtube un video-intervista fatt da lù a na signora che testimoniava
de essarse salvata grazie aea segnalazion del "terremotologo Giuliani".
Nessun copyright infranto.
Semplicemente na notizia scomoda a qualcuni.

http://www.byoblu.com/post/2009/04/23/YouTube-censura-Byoblu.aspx

Aceve già segnaeà su n'altro post come youtube el blocca account de utenti che pubblica
roba na scianta scomoda. Brutt segno.
Comunque l'intervista "censurada" l'è questa.

Pazzia totale..

Visto che a lega a qualcuni a colpa a deve sempre darghea (na volta ai teroni, dopo ai marocchini, dopo ai rumeni) sta volta a colpa l'è del magnar etnico. Kebab in particoeare.
"Bisogna salvaguardar a propria cultura culinaria! Bisogna far sarar sti arabi kebabbari" ...

Certo che se qualche secoeo fa anca i nostri antenati i era cusita "leghisti" e ora adesse no se savaria gnanca cossa che l'è el caffè.
E se saria morti da fame visto che a poenta qua da ste parti gl'iera spesso e voentieri l'unica roba da metar soto i dent par marenda, pranso e zena. Poenta fatta dae panoce, provenienza Americhe...
No ston parlar dee patatine fritte che fon fora in birreria.
E no podaria semenar pumidori (che spetacol) par far el sugo.
Ma i kebab inveze GUAI !

E quindi par a par condicio anca pizze da asporto, geati e qualsiasi magnaria "da passeggio" a deve essar bandìa.
Quindi, a luglio voè rinfrescarve co un cono co do baete de geato?. Guai a voaltri se ndè fora daea geateria ! Dentro, e mutismo. Sinò parte e multe pena che mete el piè in strada. Fin a 3mia e passa euro !!

Inredibie, ma vero.

Mah...
Na fonte dea notizia podè ledarla QUA

Ma in che razza de man son finii ....

Stusè a tivision !

Invite chiunque a aderir a sta protesta.
Che no se tratta de protesta, ma semplicemente un consiglio par migliorar a quaità dea vita.
Mi l'è oltre 7 anni che me son disintossicà dal tubo catodico e confesse un aumento dell'attività
de neuroni e risveglio dal torpore mediatico che vien fora daea tivision.
A tivision a era nasesta come strumento par informar, na finestra informativa sul mondo.
Col passar dei anni l0è peggiorada, adesse l'è el pedo strumento de propaganda economico-poitica-sociale.
E un potente anestetico par el zervel.

Quindi, gente, sta settimana ma anca e prossime trè via el teecomando e faseve na ciacoeada in tra de voaltri, o ndè vedar come chel sta el vicino. Dai, che tant el campionato el va vanti instesso anca se no vardè Del Piero diogar !

http://www.repubblica.it/2009/04/sezioni/spettacoli_e_cultura/gb-protesta-tv/gb-protesta-tv/gb-protesta-tv.html?ref=hpspr1

Fortaja de Bruscandoi

Son stati a respirar un poca de aria sana dae bande de Monfumo.
A un certo punto vede do femene piegae sua schena co dee borse de plastica piene.
Tire na scianta i occi e vede, anzi intuisse, che e va in zerca de bruscandoi.
Me fae corajo, leve su dal prà e tache anca mia vagabondar par siese e bosc.
Pena che lore e va via, e ora scumizie a cavar bruscandoi a manetta.
Primo dubbio : i bruscandoi i è rampicanti : vai zoncai aea base oppure vizin aea ponta? Riposta: cavar solche a parte pì moea : el dur nol va in tecia, quindi cavar circa 10cm del bruscandol.
Dopodichè, na volta rivai casa ...

• Sbatar dei vovi su na scudea. Circa 2 vovi par persona.
  
• Assar sofridar ojo (de oliva ovvio) zegoe e ajo. Abbondanti.
  
• Pena che e zegoe e se "abbronza", dontarghe i bruscandoi.
• Spetar sui 5 minuti .. quindi dontarghe i vovi sbatesti.

No so se ghe sia dee varianti ... comunque intanto va ben cusita...
bon appetito, e me raccomando un bon goto de moro, no acqua.
Me nona diseva che l'acqua serve par lavarse i piè ...

Shutter - Scionsciot par gnome

Spesso capita, par far documentazion mista testo/immagini, de aver bisogno
de vedar el contenuto del schermo (o na parte) e incoeaerla come immagine in un documento de videoscrittura (openoffice wraiter par esempio o un programma de email tipo Lotus Notes). Co na paroea: far bei scrinsciot.
A "copia sugli appunti" de na schermata su ubuntu a ghe n'è solche daea version ubuntu 8.10, quindi recente . Che a te permette, tramite el tasto Print ( o Stamp su alcune tastiere) de catturar a intera schermata, oppure Alt-Print de catturar solche a finestra corrente.
No so su KDE come che a sie a storia, ma presume no tant diversa.

Bon, spesso però el contenuto che voeon incoear no l'è de na intera schermata o dea finestra corrente, ma magari de solche un toc de schermo, o un dettaglio particoeare. Questo, oltre che par dar enfasi solche a na determinata parte dea schermata, serve anca par rendar pì snello e pì leggibie el documento che dovarà contegnar tute ste immagini. Pensè, par esempio, a na specie de guida passo-passo par documentar a qualcuni come far a eseguir na determinata azion, o su come utiizzar un programma, etc : l'è sufficiente che e immagini e se limite solche all'essenzial. Anca par sparagnar qualche mega.
Bado ae ciance, ghe n'è na applicazion che ancora no a fa parte dei repo standard de ubuntu. Ma secondo mi a merita no solche de entrarghe, ma anca de sostituir quea de default (gnome-screenshot se no sbaglie).
Sta applicazion a se ciama shutter. Vardè QUA come che a se presenta e cossa che a fa.

Par instaearla...l'è fazie

• Bisogna essar picai a internet, e lanciar el terminale (Applicazioni/Accessori/Terminale)
  
• sudo gedit /etc/apt/sources.list
• Dontarghe el repo: aea fine del sources.lst , dontarghe sta righe : deb http://ppa.launchpad.net/shutter/ppa/ubuntu hardy main e anca questa deb-src http://ppa.launchpad.net/shutter/ppa/ubuntu hardy main (sostituir hardy co intrepid o jaunty, aea seconda dea version de ubuntu che usè)
• Salvar el file e ndar fora
• INSERIR A PPA KEY(no ho mai ben capio cossa che serve ste operazion, ma bisogna farle: wget -q http://shutter-project.org/shutter-ppa.key -O- | sudo apt-key add -
• AGGIORNAR A LISTA PACCHETTI: sudo apt-get update
• INSTAEAR SHUTTER: sudo apt-get install shutter

A sto punto sotto Applicazioni/Accessori (zioken un dì ghe sarà anca a traduzion de ubuntu in diaetto, spere) ghe sarà l'icona par lanciar shutter.

L'uso l'è abbastanza intuitivo.
Oltre ae amenità che personalmente no use tipo mettarghe l'ombraggiatura o el fondotinta ae finestre, a funzion che da soea a val el 90% de sto strumento l'è cliccando su "selezione" : col mouse se seeziona l'area del schermo che se vol "copiar", na volta scelta l'area se ghe dà un INVIO e a posto. A sto punto Un bel CTRL-V sul nostro Writer (o Lotus notes, o thunderbird , vedè voaltri) .



Pì fazie da usar che da spiegar.

Na roba che ancora no ho capio come cavar (o forse la è na limitazion) l'è che qualsiasi scrinsciot el vien salvà in tea directory specificada nee "preferenze" de shutter.
Shutter el resta anca sua tray de gnome ... opzion comunque disattivabie nee preferenze.
Comunque in generale, strumentin ottimo.

Hostess di cassa

No voeve credarghe...son ndat al castorama parchè me servia qualcossetta pal giardin. Co l'è ora de ndar pagar, vede scritt sua targhettina de riconoscimento dea cassiera, oltre al nome e cognome, a quaifica de "Hostess di Cassa". Ma zioken... "Cassiera" eo cusita umiliante ? O forse a radice dea paroea a ricorda in qualche modo el "casso" e quindi a podaria infastidir qualcuni? Son senza paroe...
E ora i commessi in corsia che mette e cava roba sui scaffai come se ciamei? Steward di Corsia ??
Ma per piacere ...

Fugazza blues

Son vizini a pasqua.
Asson star na scianta el significato reigioso, che el vien smontà facilmente da documentari tipo ZEITGEIST, ma pitost el discorso culinario.
Ligà aea pasqua ghe n'è dae me bande a tradizion dea fugazza. Na specie de panetton "pesante".
In altre parti d'italia, coa paroea "focaccia" se fa riferimento a na specie de pizza. Pì alta in quanto pì lievitada.
Bon ... mi no saveve ma nel 2006, a Altamura in Puglia un mcdonald l'ha dovest sarar baracca e burattini par merito de un panettier che coe so fugazze l'ha praticamente sbaraglià i amburgher fatti de plastica dea mcdonalds.
Notizie a riguardo se ghin catà a iosa, ecco QUA par esempio una articol.
A breve vegnarà fora un film, che se ciamarà Focaccia Blues.
Ecco el trailer



Qua inveze un documentariet che parla un pò in dettaglio dea vicenda, e che cerca de metar in risalto che quel che conta l'è a quaità, no tanto el marketing o i coeori de un marchio (tipico de tute e merdae che riva da oltreoceano).



Penso proprio che, dopo anni, tornarò al cinema da novo...

RIP , Pin

Robe da no creadar...
E ora..
Fasè finta de aver na casa, quee de na volta, co cortil, graner, etc.
E quindi visto che na olta no esistea in condizionatori, par star al fresc i stava sotto un albero, all'ombra.
Spesso se usava un cuchèr (albero delle noci, va ben??) ma inveze ghe n'è chi che piantava pìn. Del resto i pìn i dura tant, i è sani e i fa bea ombra. Almanco pense...no son proprio sicuro.
Comunque... improvvisamente intanto che voaltri siè sotto el vostro pìn secoeare (sul serio, l'avarà 100 ani) drio farve fora meda bozza de vin, vizin de voaltri riva na ruspa. E nel giro de pochi mesi ecco che spunta condomini. Chiaramente a pochi metri de distanza.
Bon, a qualcuni dei novi vizini ghe da fastidio sto pìn. Par cossa?? Par a processionaria. Parassita sicuramente fastidioso. Ma de sicuro no l'è roba nova. El fatto l'è che i "nemici naturai" dea parassitaria, che in base aea catena alimentare i dovaria magnarsea, semplicemente no ghi n'è.
Ledar qua, par notar come che i desaparecidos cinciallegre o upupe (e mi dontaria anca i ROSPI, se ghin fosse) i saria el pesticida naturale.
Chiaro che costrussi costruissi inquina inquina, ... more tutti. E anca noaltri, anca se no se incordion.
Bon... imaginè che i vostri vizini, magari co qualche amighet compiacente in comune o qualche assessor, el ve rivè là co na carta che consente l'abbattimento del vostro bel pìn. Cossa podeu far ? Ben poc...purtroppo. Se non assistar aea morte de un albero...
Sta storiea qua purtoppo la è vera.
Anca se mi, che stae a pochi pass dal posto in oggetto, onestamente processionarie no ghin'ho mai catà...

Questo l'è l'omicidio del pin, col sicario in azion










Questo inveze el so funeral ...

Se stava mejo na 'olta ?

Uncuò se era drio farse na caminada in tee campagne dae bande tra Cison e Revine, e a un certo punto vede un tipo, sua settantina, drio ravanar sue vit. Mi che son curioso, vae là par vedar cossa che gl'iera drio far. Gl'iera drio incalmar uà. Roba che mi mai sarò bon de far. El me lavoro ufficial l'è de informatica, ma quando che vede certe robe me sente na merdaccia. Cossa serve saver instaear e configurar un server? Ben poc, quando che te vede sti personaggi che coe proprie man i sa crear, lavorar, e far roba che effettivamente serve. Mi letteralmente adore parlar co certa gente, che i ha esperienza de vendar e tanta roba e saggezza da dir. Forse anca parchè no me son massa godest i me 4 nonni, adesse tuti morti.
E in te ste situazion, semplicemente scolte, e fae dee domande. Visto che mi ho ben poc da dir (visto che no so far praticamente un casso). Ammette i me limiti.
A un certo punto, quando chel me contava dea vita de 40 anni fa dura, levar su ae 4 de matina par ndar sui camp e rivar casa desfai, ciapando sòno coi oss che fa mal, etc ... a domanda da parte mea l'ha e stata spontanea : ma se sta mejo adesse co tute e comodità che avon (ma respirando piombo e magnando porcaria) oppure na volta che, pur lavorando duro, i vivea na vita pì lenta, pì sana e pì naturae ?
El me ha risposto che dal punto de vista del lavoro se sta mejo adesse. Lavorar 8 ore in fabbrica al dì de uncuò no stufa come lavorar 8 ore in tei camp na volta. Adesse dopo 8 ore de fabbrica te ha a forza par star in piè altre 10 ore. Na volta inveze dopo i camp te vea forza solche par spojarte e trarse soto in nizioi.
A domanda successiva l'è stata, visti i tempi correnti, se a gente (in particoeare i doveni) a saria in grado de tornar a stili de vita antichi (manco fadigosi visto l'aiuto dea tecnoeogia) oppure se pitost i ndaria robar.
El me a risposto disendo : "Te imaginetu un bocia de 20 ani che nol cata lavoro, secondo ti aeo voja de ciapar in man a forca?". A me controdomanda "... ma se no ghe n'è pan da magnar"... Al che lù el me ha prontamente dita "... Pitost el va robar".
Sta roba qua a me a dat da pensar ... Nel giro de 40 anni son passai da na civiltà contadina (durada millenni) a na società borghese e finta. E adesse no savon pì tornar indrio. In pochissime generazion avon pers el "saver far". Gnanca pì bruscar na vit no son boni...