Diaetto a scuoea

a me opinion ? Assoeutamente contrario.
El diaetto se l'impara e se o "pratica" casa, al bar, al campett coi amighi.
Come tutte e robe che se insegna a scuoea a vien imposta, bisogna "studiar" el diaetto.
Insensato.
El diaetto se o parla casa, se l'impara semplicemente scoltandoeo da mare e pare.
Mi a scuoea ho studià e imparà robe che me son desmentegà dopo na settimana : se te impara qualcossa ma no te o pratica, e ora no serve a gnent.
El diaetto come qualsiasi altra roba "popoeare" no a deve essar insegnada in modo didattico. Saria come insegnarghe a un ceo par esempio come sistemar na carega rotta: assoeutamente inutie se a rimane na spiegazion fine a sè stessa se dopo el ceo nol se mette ogni tant a riparar qualche carega rotta. Dopo un poc, a no far e robe, se se desmentega.
Mi ho "studià" francese ae medie. Mai pì parlà. Me ricorde sì e no qualche paroea e qualche frase.
Saria a stessa roba par el diaetto.

Altro esempio: lavore su na azienda certificada ISO, e par aver l'ISO bisogna tra e varie robe che ghe sia un gruppo de persone che ogni anno vien addestrae par l'antincendio, o par el pronto soccorso. Bon, mi son uno de quei che na volta all'anno vien un paramedico a aggiornarme sul cossa far nel caso del primo intervento, compresa a respirazion bocca a bocca, laccio emostatico etc. Gnent da dir. Pecà che se dovesse capitarme de soccorrar qualcuni ciapà mal sicuramente nol trovarà in mi a persona giusta par iutarlo. Anzi, risciaria de far pedo.

E dopo...che diaetto dovarisii insegnar ? Quel dei nobii veneziani o quel dei montanari da beùn ?
Come che no ghe fosse rogne ben pì importanti da sistemar, altro che diaetti ... Ma savon come che la è ... ma no vui parlar mal de "poitici" .. Asson perdar ...

Intanto, par i nostalgici del diaetto....ciapè qua: