El proibizionismo del kebab

Quando che sente certe notizie no se se metarme a ridar o a porconar.
Poitici, sindaci e assessori i dovaria lavorar par el cittadino, studiando e fasendo robe al nostro servizio.
Ecco inveze che vien fora sto mito, el sindaco de Cittadella, tale Massimo Bitonci. Leghista duro e puro, pararia.
Addirittura co un'ordinanza, na specie de "editto" dei tempi nostri, el proibisse a vendita del kebab dentro e mura : FONTE
Parchè? Riporte e so testuai paroe : "... nulla hanno a che vedere con la cultura e la tradizione della nostra terra, come certi prodotti etnici o certi alimenti, come il kebab, che mal si inseriscono nel contesto storico, tradizionale e territoriale nel quale viviamo".
Anca mi saria uno che ghe tien al mantenimento dee tradizion, dee proprie radici. Ma no se pol mantegnerle in te sta maniera qua: dovaria essar qualcossa che se porton dentro noaltri, tramite continuità culturale/linguistica/artigianale che passa da pare/fiol e mare/fioea. No l'è certo fasendo sparir i kebab che i "cittadelliani" (se dise cusita?) i dovaria sentirse pì "veneti". L'è un poc come proibir ai bar de sonar rock in inglese, roba "etnica" parchè qua se dovaria solche scoltar Vivaldi.

Ma caro sindaco, a sto punto par essar coerente col to pensiero no te dovaria anca:
- Bandir a poenta...altro che tradizion veneta... a poenta l'è fatta coe panoce, daea pianta del mais, che no l'è certo nativa dee nostre pianure. A riva dall' america...
- Stesso discorso par pumidori&co : ieri me son fat na insaeata pumidori e pevaron. Roba che riva da oltreoceano. Che poc spirito veneto che ho ....
- A tradizion veneta no vol majette o scarpe fatte in cina o roba griffada. Bisognaria ndar tutti vestii co strazze e ai piè usar zopèi o gaeozze...
- Bisognaria trar dò meda Venezia, visto che la ha abbastanza copià
(e robà) dall'architettura bizantina (cioè turca, come el kebab). Basta vedar a basiica de s.marco tant cara ai leghisti e ai "serenissimi"... E ovviamente parchè consentir de costruir appartamenti visto che a tradizion veneta la e fatta de cason grandi ?
- El SUV fae parte dea tradizion come bici e careta ?

Se podaria ndar vanti par ore ...

Caro sindaco, capisse che te vol accaparrarte e simpatie dei to concittadini e so che l'è nel pì tipico stile leghista quel de aver sempre qualche "diverso" co cui ciaparsea.
Del resto el mejo modo par farse dei amighi l'è "aver un nemico in comune", giusto?
Comunque a nu el kebab el me piase, anche se ho qualche dubbio sua genuinità e provenienza dea carne ...

A proposito ... in germania i ha ordinà a chiusura dee pizzerie. A motivazion, strana, l'è che rappresenta "cibo etnico". Se podarà solche consumar wrustel , crauti e patate....