Ciodet

Me son cavà na soddisfazion.
No ghe sperave, e appunto par questo l'è ancora pì granda.
Me son ciolt na giornada de ferie, e son ndat co me pare sul montel qualche ora
in zerca de ciodet. Chiodini. Armillaria Mellea. Roba bona.
Dopo un'ora e meda se aveva catà sì e no qualche etto. Del resto a stajon l'è
finia, e el montel pullula de gente che va a fonc.
De soito uno el se da corajo, e se passa meda ora senza catar gnent, che gira i cocomeri
e el va via.
Anca noaltri se era ormai sua via del ritorno, quando improvvisamente (e stranamente)
nel giro de pochi metri quadrati avon catà qualcossa come 10 kili de ciodet. Quei da opa,
che i è quei pì boni. Sia su zoc che par tera. Avaron passà na ora bona no a ndar in zerca, ma a tirar sù ciodet ! Sudave!
Sta foto qua no rende giustizia e no rende idea de quanti fonc che i è. Abituà come che son a tornar casa con 1 kg quando che a va ben ...
A cattiva notizia l'è che dopo i ciodet bisogna curarli. E ghe ho assà l'onore ai veci ...
Mi spette un invito par magnarli col tocio dea poenta