Eugenio ... Bene, Cazzo !

Son ndat a sentir l'altra sera a Giavera Eugenio Benetazzo
Esperto fin che te vol in finanza ecomonia banche, el se definisse (let sul
so sito http://www.eugeniobenetazzo.com) un "predicatore finanziario", na specie
de Gesù Cristo par quel che riguarda tut quel che gira intorno ai schei.
Gnent da dir, l'ha na diaettica e na padronanza dell'argomento assoeutamente bona, anca se
mi ammette e confesse a me totale ignoranza in materia nonostante qualche tentativo da parte mea de capirghene qualcossa de pì. Ghe ho provà, ma no son ancora bon de capir gnanca e basi su cui se fonda l'attuale sistema economico (in primis: el debito), figurarse quando che i parla de bond o de obbligazion. Al secondo "euribor" aveve già mal de testa e ghe o rinuncià.

Purtroppo però el nostro guru dea finanza l'ha esplicitamente dichiarà col so accento padovan, durante una dee so esternazion relative all'aspetto sociale dell'economia, un razzismo integrale sopratutto verso i musulmani. A so parere a vera causa dei nostri mali, economici e non solo.
I animi i se ha scaldà quando che uno in platea (un nord-africano suppongo) l'ha scumizià a dir "Menzogna, menzogna" appena sentio che "Quasi tutti gli extracomunitari vengono ingaggiati dalla malavita, e non hanno problemi a premere un grilletto per pochi euro". Argomentazion poc felici visto che l'incontro l'è stat organizzà dal Gruppo Acquisto Solidale Laico de Giavera. Che infatti aea fine l'ha espresso tramite un so membro a contrarietà dell'argomento. Ma quasi nessun altro (compreso el sottoscritto) i ha avest el pel sul stomego de ribattere e demenze razziste del benetazzo.

Del resto ... comodo ciaparsea contro chi che avon SEMPRE sfruttà e continuon a sfruttar. Anca l'Africa, da secoi coeonizzada dai europei, e tutt'ora coeonizzà dae soite multinazionali (petrolio, oro, minerali, caucciù, risorse naturali).
Son tuti bravi ndar a far disastri a casa de chealtri, ma pena che qualcuni de sti disperai vien casa nostra par aver na vita pì dignitosa, e ora ecco che diventon tutti orrorizzai.
Se faria a stessa roba anca noialtri. Anzi, i nostri nonni ghe a tocà far a stessa roba.
Speron che no me toche da novo quei anni là ...