Germogliatore

A settimana passada me fèmena a vien casa co un attrezzo de terracotta, a prima vista a pareva na pagoda cinese a 4 piani. In realtà se tratta de un "germogliatore". Cossa eo ? Na roba che se ghe mete dentro dee semenze, che e germoglia dandoghe da bevar, stando attenti a verdar/sarar sto germogliatore che de nott passe aria, e de dì no passe luce.
Ndon co ordine : eminenti nutrizionisti sostien che i germogli (in diaetto "bùt") i apie proprietà alimentari mirabolanti, che chi che ha qualche minuto de pazienza pol vedar a STO SITO .
Chiaramente i bùt deve essar freschi e qual eo el modo migliore par averli freschi? Farli cressar e magnarsii apena che i è pronti.
Chiaramente son ancora drio sperimentar e "tecniche" de germogliazione (se pol dir "bùtazion?)
A sequenza dovaria essar questa:

1. Lavar e semenze de sera e assarle in ammollo par tuta a nòt.
2. Metar e semenze sui vari ripiani del .. "butador" , no massa fisse. A temperatura ambiente.
   
3. De matina, sartàr un goto de aqua sul livèl pì alt. "Saràrlo" in modo tale che no passe luce (questo dipende dal tipo del butador). L'aqua a se depositarà sull'ultimo vasèt.
   
4. Dopo qualche minuto, trar via l'acqua dall'ultimo vasèt (deghe da bear ae piante!)
5. De sera, rifar i passi 3 e 4, verdendo però i bùs cusita passe aria (e no entre luce). Sta fase qua son però ancora drio sperimentarla.
6. Dopo 3-5 dì (dipende da temperatura-umidità-semenze etc) se dovaria vedar i bùt numerosi e longhetti, no spettar massa dì sinò i fa muffa.
7. I germogli i è bianchi visto che no i ha vist luce ... basta quindi mettarli aea luce del sol par na giornada e i dovaria vegnar pì verdi.
   
8. Tirar fora, slavar na scianta e smissiarli sull'insaeata.

Fin desse qualche risultato l'ho vist. Chiaramente co l'esperienza uno impara trucchetti e metodi par ottimissar a raccolta.
Che semenze? De tut : daea soia, a qualsiasi cereale, a erba medica (alfa alfa). Basta chel germoglie.

Metarò dee fotografie.