Montebelluna Paleoveneta

Quando che se riva in prossimità de un centro abitato, o de un paese, son abituai a vedar i soiti cartei stradai. I coeori dei cartei indica el tipo de informazion che se vol dar : par esempio cartel bianco co scritta bianca indica l'inizio del paese, quei blu i da indicazion stradai.
Quei maron i dovaria indicar posto de contenuto turistico.

Montebeuna : comune dall'attrattiva turistica praticamente inesistente. El "centro storico" l'è in realtà na strada trafficada che divide in 2 un "centro" inquinà co l'unica attrattiva de negozi da vestir e qualche desina de banche. Oltre ovviamente ai onnipresenti cantieri co gru pronte a spalmar tonneate de cemento come a nutella su un panin.
Gnent a che vedar par esempio co altri comuni el cui centro el pol veramente essar definio "storico", vedi Castel, Oderso, Vittorio, etc. Par no parlar dei zenteneri de favoeosi centri storici del centro italia.

Ma da qualche anno, par qualsiasi persona che riva a montebeuna, ecco che un cartel maron el ghe dà el benvegnest. "Montebelluna, CITTA PALEOVENETA"...


Chinque , al vedar el cartel , el se spetta de vedar o catar chissà cossa. Nol sa che l'aggettivo paleoveneta el ghin'è par via dee recenti scoperte de qualche tomba o manufatto che risale a qualche millennio fa. Ma scordeve de vedar indicazion che indiche a qualche "parco archeologico" o roba del genere. Montebeuna l'è un posto che de turistico no l'offre gnent. Parchè l'è stat costruio ad hoc a fine '800 semplicemente par spostar el marcà. Da na coineta la vizin (marcà vecio, appunto).

In qualsiasi posto se cata qualche oggetto, grant o ceo chel sia, che dae na traccia dea presenza dei nostri antenati. Anca Cencenighe, tant par dir un posto a caso, l'è sicuramente "Paleoveneta" da sto punto de vista. O Pordenon "paleofurlana".
Me ricorde me pare na volta el me diseva che da bocia, intanto che i vecci arava el camp, el vassor el se era improvvisamente fermà par via de un "sass gross" : la era na tomba romana. In locaità Busta. Vol dir che sul cartel stradal i dovaria scrivar "Busta, città romana" ?? Ma feme un piazer..
No pense che a Niu iork ghe sia scritt "Niu iork, città olandese...".
Par no parlar dopo dei cartei maron (turistici, da novo) dee frazion : "S.Andrea, ANTICO territorio di Visnà". "S.Gaetano, ANTICO territorio di Pieve". Ma che casso vol dir !!


Ieri altro ho addirittura vist na indicazion (marron, cioè turistica), che indicava dove catar el "Centro informazioni turistico"...
Montebeuna l'è na cittadina spenta, fatta da cittadini spenti, boni solche de ndar lavorar par mantegnarse el machinon o par pagar e rate del mutuo dea casa. No tutti, ma parecchi ... tuti che vol far i "novi ricchi", che deve esibir el "benessere" raggiunto.
Occio che i e drio vegnar vanti tempi duri...
L'è na me opinion personae ... ma no pense de sbagliarme tant.