Cressar a latte e inglese

Ieri altro sua cassetta dea posta, oltre ae soite pubblicità dei
soiti ipermercati, me cate anca na pubblicità che a me ha dat un senso de tristezza...
L'è scritt questo:
Servizio di babysitting con opportunità di imparare l'inglese in un ambiente bilingue attraverso attività bla bla bla...
aperto a tutti i bambini dai 3 anni un sù e attivo il pomeriggio.

Co tanto de sito (in doppia lingua ovvio)
(HO RIMOSSO EL LINK AL SITO SU RICHIESTA DEL TITOEARE DEL SERVIZIO DE BABYSITTING IN OGGETTO)

Mi no son na cima, ma ben o mal l'inglese o capisse e se deve farme capir, pì o manco ghe riesse. Notare che mi "dai 3 anni in sù" (ma anca dai 3 anni i dò) i me ha sempre e solche parlà in diaetto. L'inglese se fa sempre ora a impararlo.
Ma ultimamente ho notà che i cei, pena che i finisse de parar dò late col biberon, i deve essar suito messi a far qualcossa. Eco quindi che bisogna iscrivarli a far nuoto, o corso de scacchi, o informatica, inglese, etc. Co relativo stress da parte de mare o pare (o nonni) che deve strasinarsii drio , in vanti e in drio.

Boia scheo, ma a 3 anni eo proprio importante imparar l'inglese? Nol capisse ben gnanca l'italiano (o el diaetto..).
Mi capisse che i cei i impara veocemente qualsiasi roba: l'elasticità mentale l'è impressionante.
Ma secondo mi ghe n'è ben altro che bisognaria insegnarghe ai boce al dì de uncuò : dopo diese ani i sarà tuti boni parlar inglese, ma no ghe sarà pì nesuni bon par esempio de pontar un calzet, o cusinarse na fortaja, o farse do gombine de ort, o sistemarse na roda sbusada de na bici.
Tut in tea vita serve, no se smette mai de imparar.
Ma a me parere ghe n'è dee priorità. Che ultimanente e i è drio rabaltarse.
Sempre pedo ... ah no ... "always worse" ...