El Gran Leon

Tau Tona : In lingua nativa sudafricana vol dir "El Gran Leon". Ricorda na scianta el simboeo de Venezia col so leon aeà, vera ?
In realtà Tau tona l'è na super mega struttura, creata verso i anni '50, par tirar fora oro da sotto terra. Numeri impressionanti : sta roba a riva fin a 3,6 km de profondità, ghe lavora mieri de persone. Quel che salta subito all'ocio vedendo el documentario (che consiglie de vedar) l'è che i "ingegneri" i e tuti del pel bianca e cognomi europei. Insomma, i soiti coeonizzatori. Ma ovviamente i porican che va a farse 10 ore in miniera i è i "nativi", neri de pel e sicuramente anca neri incazzai.
Chiaramente sfidar a natura in te sta maniera qua a comporta diversi rischi.
Par esempio:
- "Terremotini" frequenti che pì che te va bàs pì i e frequenti.
- Gas tossici (metano) che , se inalai, i te fa perdar i sensi.
- Pression altissima ... provon pensar a quantità de montagna che sta sora e so teste.
- Acqua co forte pression e temperatura che a pende dai lati dei canai scavai.
- Temperature altissime : a 3,6km de profondità e tocca quasi i 60°. Umidità no ghin parlon. Chiaramente appositi areodotti i "rinfresca" l'ambiente portandoeo a 28°. Che no i e pochi.

L'è ovvio che l'elettricità necessaria par tegnar operativo un mostro del genere l'è immensa : me par un milion de doeari al mese de boeta.

Chiaramente a prevision l'è quea de ndar ancora pì bassi. A quasi 4 km.
Del resto, mediamente more "solche" 5 minatori all'anno. Cossa vutu che sia, rispetto al guadagno dee multinazionai dell'oro? 5 vite umane l'è un prezzo adeguato ... ma zioken...

Se siè maridài, probabilmente sull'anulare dea man sinistra avè na fede. Bon, par estrarre l'oro necessario par far na fede bisogna tirar fora na tonneada de terra. Oltre chiaramente al lavoro duro dee persone. Ma probabilmente chi (come mi) generalmente el se guadagna a ciopa de pan sentando el cul su na carega e drio na scrivania, certi problemi no li conosse.

Un consiglio quindi ... boicottar el pì posibie l'oro...

p.s. su internet grandi informazion su tau tona no ghe n'è ... strano... o sonti mi che sbaglie ndar in zerca ?