Frogger

Ieri sera ho fatt na roba che a me ha dat soddisfazion e che a me ha "inpiniò" dentro. No, no, no ho magnà na pizza battuta ...

Recentemente a casa dei mei ghe ho dat na ociada al gazzettin. Tant par vedar se l'informazion a continua a essar maniopeada e strumentaizzada par pilotar "l'opinion pubblica" in base aea voeontà de chi che "move i fii" de sto teatrin. E purtroppo se ndave in zerca de conferme ghi n'ho catà tante. Anca lori giornalai, servetti de partiti e poteri forti. Che scrive no quel che i pensa, ma quel che vol "lorsignori".
Ad ogni modo, sue pagine de montebeuna ho lett un articoet interessante che me ha incuriosio: QUESTO che in pratica segnaea l'emergenza rospi.
Se podaria scrivarghe pagine e pagine, ma in pratica in certi periodi dell'anno (inizio primavera) i rospi i va in certe zone par a riproduzion. E spostandose par rivar a sti posti i deve spesso attraversar certe strade. Che vol dir morte sicura, schinzai da macchine che va a manego.
Sti spostamenti i vien de sera, col scur. E se piove, ai rospi no ghe par vera... Noaltri ndon fora da casa se l'è na bea giornada de sol, lori inveze i sclera par a piova. Strano, no?

Quindi avon contattà na persona che coordinà uno dei gruppi che se occupa de "darghe na man" a sti rosp a rivar a destinazion.
Ieri dopo che ha scumizià a piovar, riva na teefonada : "Ragassi, l'è in corso na strage, se podè, vegnè dae bande de S.Mama dopo Zian (Ciano) a dar na man.
Quindi monton in macchina attrezzai dell'occorrente:

• Mastea
• Gilè catarifrangente (quel che tuti dovon par obbligo aver in machina)
• Pila, mejo se co batterie de scorta e co un raggio de azion decente.
• Stivai
• Guanti (i rospi i sbrissa dae man, e i secerne anca sostanze irritanti par a pel).
• Abbigliamento adeguà in caso de piova (k-way, bareta etc)

A procedura l'è questa:

• Caminar drio el bordo dea strada da cui riva i rospi.
• Metar in tea mastea i rospi. Impinirla a metà, parchè i rosp no i se schinze tra de lori.
• Butar l'ocio anca sua strada : qualche rosp fortunà ogni tant se o trova indenne in medo al resto dea carneficina.
  
• Portarli su un posto ben definio, da dove i pol proseguir a so "passeggiata" verso a so destinazion. Nel caso specifico, vizin el piave.

A proposito ... i rospi no i è i masci dee rane..
I rospi i è i masci .. dee rospe ! L'ho savest uncuò.

Quasi tre ore de "rospismo".
Verso l'una, i gestori de un bar i me ha vist e i me a offerto un caffè fasendo i complimenti. I bei gesti i vien sempre ripagai. E sentirse dir "bravi ragassi" l'è sempre un piazer. Chiaramente avon anca ricambià el piazer butando in tea mastea do rosp che i se era intrufoeai nel locale. Come, no se sa.

Unica nota dolente l'è vedar desine e desine de rosp schinzai sua strada. I pì fortunai i more sul colpo. Altri inveze i agonizza.
E visto che i va a riprodurse, l'è frequente trovarli accoppiai cusita...


Voendo butarla sul ridar, se pol dir che almanco i more trombando ...

Intanto che impinive a mastea, me vegnea in ment parecchie similitudini
col diogo frogger. Mitico !!! Chi no lo conosse o nol se o ricorda ?


A rana che deve traversar a strada, e macchine che passa, i tronc del montel, a "rospa" da accompagnar a destinazion, i rumori che i fa i rosp (che bei!!!)
Identico al diogo.
Se voè farve na partietta, e no voè perdar temp a instaear el gxmame su ubuntu, e ora faseve na partietta. Ma na volta fina a partietta, ndè dar na man a salvar ste creature. "Bruti come rospi" ma utii all'agricoltura : i magna scios e murice e limeghe, salvandove l'ort ...

Frogger made by Neave Games