Poreti, ma Contenti

Parlando co qualsiasi ultra-settantenne, e cioè coa generazion che i a avuo modo de vivar a transizion daea miseria post-guerra fin adesse, i te contarà nostalgicamente che na volta i stava mejo, anca se i era pì poreti. Chel sia un fatto puramente ligà aea nostalgia podaria anca essar, del resto finchè no te vive na situazion sua pel, direttamente o indirettamente, te deve accettar quel che i te conta.
Bon, me a capità l'altra sera de provar indirettamente, e indirettamente fiss, na situazion del genere.
In pratica, na coppia de conoscenti, sposai e tranquii, sani de principi, operosi e semplici i ha adottà 2 cei (4 anni ea, 5 anni lù) del sudamerica. Cei da orfanotrofio, e a vita co sti boce no l'è stata generosa visto che mare e pare i ghe n'ha fate de cotte e de crude. Sti cei i deve essar passai par situazion e aver visto robe che definir "terribii" l'è sicuramente poc.
Son ndati catarli. Mi dopo meda ora ere già letteralmente desfà visto che, come tutti i cei, i ha energie da vendar, batterie sempre cariche, e voja de diogar.
Ma quel che me ha sconvolto (positivamente) l'è stat l'affetto incondizionà che ste do creature e dava. I se picava, i me ciapava par man, i se strendeva su par de mi, i dava e i voea basi. I rideva de gusto. Addirittura i ciapava a me man e quea dea me moglie, avvicinandoe parchè e se strendesse, i me disea de darghe un baset (sempre mi coa moglie). E el tutto in modo cusita normale ... chel pareva quasi par finta.
Sti cei qua i ghe n'ha patìo no so quante, no i ha mai avest gnent tranne sicuramente affetto dal personale dell'orfanotrofio. E proprio sto "background" qua l'ha fatt in modo che sti cei i vae in zerca de quel che conta davvero : el caeor umano, a sensazion de sentirse voesti ben e viceversa el dar spontaneamente l'unica "roba" in so possesso : amore.
Chiaramente el paragone coi so coeateni occidentalizzati del mondo "civile" l'è stat pressocchè ovvio. Inutie dir che a sensazion de sentirme na merda, sia mi sia el mondo a cui appartegne, l'è stata fissa.
No ho mai conosest un ceo de 4-5 anni (no parlon de quei pì grandi) che nol sia lagnoso par cagae, che el cria se no i ghe da quel chel vol, che nol sia vizià all'estremo. El tutto condìo da quintai de iper-protezionismo tipici dei neo genitori dei nostri tempi, che rende un ceo na specie de ... specie protetta in quanto potenzialmente estinguibie anca par un raffreddor : "No, tesoro, copriti la gola per bene altrimenti prendi freddo e stai male...mi raccomando attendo a non sudare (e magari in luglio coa canottiera de lana) "...
Mi no ho fioi e quindi l'è anca fin massa fazie da parte mea criticar.
Però ... ho avest a netta sensazion che sti boce, poreti in scarsea ma gran siori de cuor, i stae mejo dei so equivaenti "borghesi".
Na pleistescion de manco, ma na carezza in pì.
Insomma, poreti ma contenti...